To knowe the ascensions of signes in the embelif cercle in
every regioun, I mene, in circulo obliquo.
Set the heved of the signe which as the list to knowe his
ascensioun upon the est orisonte, and wayte where thin almury
touchith the bordure, and there set a prikke. Turne than thy
riet upward til that the ende of the same signe sitte upon the
est orisonte, and wayte eftsonys where as thin almury touchith
the bordure, and set there a nother prikke. Rekene than the
nombre of degrees in the bordure bitwyxe bothe prikkes and tak
there the ascensioun of the signe in the embelif cercle. And
understond wel that alle the signes in thy zodiak, fro the heved
of Aries unto the ende of Virgo, ben clepid signes of the north
fro the equinoxiall. And these signes arisen bitwyxe the verrey
est and the verrey north in oure orisonte generaly for evere. And
alle the signes fro the heved of Libra unto the ende of Pisces
ben clepid signes of the south fro the equinoxial; and these
signes arisen evermore bitwixe the verrey est and the verrey
south in oure orisonte. Also every signe bitwixe the heved of
Capricorne unto the ende of Geminis arisith on oure orisonte in
lasse than 2 houres equales. And these same signes fro the heved
of Capricorne unto the ende of Geminis ben cleped tortuose
signes, or croked signes, for thei arise embelyf on oure
orisonte. And these croked signes ben obedient to the signes that
ben of right ascensioun. The signes of right ascencioun ben fro
the heved of Cancer unto the ende of Sagittarie; and these signes
arisen more upright, and thei ben called eke sovereyn signes and
everich of hem arisith in more space than 2 houres. Of whiche
signes Gemini obeieth to Cancer, and Taurus to Leo, Aries to
Virgo, Pisces to Libra, Aquarius to Scorpioun, and Capricorne to
Sagittarie. And thus evermore 2 signes that ben ilike fer fro the
heved of Capricorne obeyen everich of hem to othir.
